Avannaata Kommuniani kajumissutsimik tunngavilimmik upalungaarsimanermik pilersitsinissamut ataqatigiissaarisoq
Kalaallit Nunaata avannaani upalungaarsimanerup nukittorsarneqarnissaanut peqataarusuppit?
Avannaata Kommunia kajumissutsimik tunngavilimmik upalungaarsimanermik kommunimi pilersitsisussamik ataqatigiissaarisussamillu tunniusimasumik misilittagalimmillu pissarsiorpoq.
Ilulissani mittarfiup nutaap nunat tamalaat akornanni angallannermut atorneqartussap ammarneqarneratigut illoqarfik annertuumik ineriartorfissanngorpoq. Tamatuma peqatigisaanik kommunimi takornariaqarneq, imaatigut angallanneq, pinngortitami sammisassaqartitsineq inuussutissarsiutillu annertusiartorput. Tamanna upalungaarsimanerup ataatsimut annertunerusumik piumasaqarfigineqarneranik kinguneqarpoq.
Kommunip upalungaarsimanera maanna pitsanngorsarneqaleruttorpoq, kisiannili pisuni annertunerusuni – soorlu imaani, qaqqami nunaannarmiluunniit ajutoortoqartillugu – sulisinnaasunik amerlanerusunik pisariaqartitsisoqassaaq. Taamaattumik atorfimmi siunertaavoq kajumissutsiminnik suleqataasartunik attaveqaqatigiiffimmik nukittuumik pilersitsinissaq, pisariaqartitsisoqartillugulu upalungaarsimanermut oqartussaasut suliaminnik ingerlatsineranni ikorfartueqataasinnaasumik.
Atorfik suliniummik aqutsisutut atorfiuvoq, kommunip upalungaarsimasuutitai, oqartussat attuumassuteqartut najukkamilu suleqataasut qanimut suleqatigalugit kajumissutsimik tunngavilimmik upalungaarsimanerup pilersaarusiorneqarnissaa, ataqatigiissaarneqarnissaa ineriartortinneqarnissaalu akisussaaffigineqassallutik.
Suliassatit
Makku ilaatigut akisussaaffigissavatit:
- Kommunip kajumissutsiminnik upalungaarsimanermi suleqataasussanik pisariaqartitsinera qulaajarlugu
- Kommunimi tamarmi kajumissutsimik tunngavilimmik upalungaarsimanermik pilersitsinissaq ineriartortitsinissarlu
- Najukkami peqatigiiffinnik, suliffeqarfinnik kattuffinnillu suleqateqarnermik pilersitsineq
- Paasissutissiilluni ataatsimiisitsinikkut, workshoppertitsinikkut attaveqaqatigiilluni sammisaqartitsinikkut kajumissutsiminnik suleqataasussanik peqataalersitsinissaq
- Takornariartitsisartunik, angallatinik ingerlatsisartunik, piniartut aalisartullu peqatigiiffiinik, qamuteralattartut peqatigiiffiinik suleqataasinnaasunillu allanik attuumassuteqartunik suleqateqarnermik pilersitsinissaq
- Kajumissutsiminnik suleqataasinnaasut attaveqarfigineqarsinnaasut allattorsimaffiinik upalungaarsimanermilu isumalluutit nalunaarsorsimaffiinik suliaqarnissaq
- Kajumissutsiminnik suleqataasut suliassaasa, akisussaaffiisa suliartortinneqartarnerannullu periaatsit nassuiarneqarnerannut peqataassalluni
- Kommunip upalungaarsimasuutitai suleqatigalugu upalungaarsimanermut pilersaarutinik suliaqarnissaq
- Kajumissutsiminnik suleqataasunut sungiusarnernik pikkorissartitsinernillu pilersaarusiornissaq ataqatigiissaarinissarlu
- Kajumissutsiminnik suleqataasut atortussanik pisariaqartitaannik piginnaasatigullu ineriartortinneqarnissaannik qulaajaanissaq
- Kajumissutsimik tunngavilimmik upalungaarsimanerup ingerlaavartumik nalilersorneqarnissaanut ineriartortinneqarnissaanullu peqataassalluni
Assersuutigalugu kajumissutsimik tunngavilimmik imaani upalungaarsimanermik pilersitsisoqarsinnaavoq, tassani najukkami takornariartitsisartut umiatsianillu piginnittut allat kajumissutsiminnik upalungaarsimanermut aaqqissuussinermut peqataassallutik. Ataqatigiissaarisup upalungaarsimanermik ingerlatsisut suleqatigalugit nassuiassavaa pisuni annertunerusuni kajumissutsiminnik suleqataasut qanoq ikiuussinnaanersut, atortussat suut umiatsianiitinneqassanersut, kiisalu qanoq suliartortinneqarlutillu attaveqaqatigiittoqassanersoq.
Naatsorsuutigaarput:
- Suliniutinik aqutsinermik imaluunniit suliniutinik annertuunik ataqatigiissaarinermik misilittagaqartutit
- Upalungaarsimanermi, annaassiniarnermi, politiini, illersornissaqarfimmi, peqqinnissaqarfiup upalungaarsimanerani assingusumilluunniit misilittagaqartutit
- Upalungaarsimanermut pilersaarutinik periaatsinillu suliaqarnermik misilittagaqartutit
- Suleqatiginnilluarsinnaasutit suleqataasartullu assigiinngitsorpassuit tunniusimallutik peqataalersissinnaagitit
- Aaqqissuussamik namminersorlutillu sulisartutit
- Oqalullutillu allallutillu pitsaasumik attaveqarsinnaasutit
- Tatigeqatigiinnermik tunngavilinnik attaveqarnermik pilersitsisinnaasutit kajumissutsiminnillu suleqataasut kajumilersissinnaagitit
- Pisortat, suliffeqarfiit innuttaaqatigiillu akornanni suleqatigiinneq ilisimasaqarfigigit
- Biilersinnaanermut allagartaqartutit (kissaatiginarpoq)
Kalaallit Nunaanni pissutsinik ilisimasaqarneq najukkanilu inuiaqatigiinni mikinerusuni suliaqarnermik misilittagaqarneq iluaqutaassaaq.
Neqeroorutigaarput
·Atorfik pissanganartoq siunertaqarluartorlu inuiaqatigiinnut annertuumik pingaarutilik
·Kajumissutsimik tunngavilimmik upalungaarsimanermik nutaamik pilersitsinermut sunniuteqarnissamut periarfissaq
·Kommunip upalungaarsimanera, mittarfik, politiit, peqqinnissaqarfik najukkamilu suleqataasut qanimut suleqatigineqarnissaat
·Suliamut tunngatillugu inuttullu ineriartornissamut periarfissatsialaat
·Annertuumik namminersorluni suliaqarnissaq akisussaaffeqarnissarlu
Atorfinitsitaanermi atugassarititaasut
Atorfik suliniummik aqutsisutut atorfiuvoq.
Akissarsiat atorfinitsitaanermilu atugassarititaasut isumaqatigiissut atuuttoq naapertorlugu aalajangersarneqassapput. Akissarsiat aalajangersarneqarneranni qinnuteqartup ilinniarsimanera, misilittagai piginnaasaalu allat annertuumik pingaartinneqassapput.
Atorfimmut atatillugu sulisunut inissiamik innersuussisoqassanngilaq.
Paasissutissat amerlanerusut
Atorfik pillugu apeqqutissaqaruit ukua attaveqarfigisinnaavatit:
Kommunaldirektøri Nick Nielsen
Allattoqarfimmi pisortaq Palu Eriksen
Qinnuteqaat
Qinnuteqaat CV-mik ilanngussanillu attuumassuteqartunik ilalik Avannaata Kommunianut nassiunneqassaaq.
Qinnuteqaativit tigunissaa qilanaaraarput.
Qinnuteqarnissamut killissarititaasoq: aggustip 23.-at, 2026