Avannaata Kommunia Uummannami angerlarsimaffimmi ikiortinut ataqatigiissaarisumik pissarsiorpoq 1. november 2024 isumaqatigiissuteqarnikkulluunniit atorfinittussamik.
Angerlarsimaffimmi ikiortinut ataqatigiissaarisup qaninnertut sulisitsisorissavaa Immikkoortortami pisortaq.
Suliassat akisussaaffiillu:
- Angerlarsimaffimmi ikiorteqarnissamik qinnuteqaatit tamaasa suliarissallugit. Isumagalugu qinnuteqaatit oqaloqatigiissutigineqarnissaat suliffiup iluani illullu avataani suleqatinut, aalajangigassanillu piviusunngortitsinerit.
- Utoqqarnut sullissinermi suleqatigisanik suleqateqarneq pillugu malinnaajuarneq aamma suliamut sullissisunik aningaasaqarneq pillugu attaveqartarneq, kiisalu kommunip iluani angerlarsimaffimmi ikiorteqarnermut atatillugu aningaasatigut aqutsisut attavigisassallugit.
- Angerlarsimaffimm ikiorteqarnerup iluani suliniutit ingerlaavartut ataavartumik killiffissiortassallugit, qaammatikkaartumik nalunaarusiortarnikkut.
- Illoqarfimmi nunaqarfinnilu angerlarsimaffimmi ikiortinik ataatsimeeqateqartarnerup imarisaanik ilisimatitsisarneq, angerlarsimaffimmi ikiortinik saaffiginnissutit aamma aningaasartallit nakkutigalugillu aqunnissaat, nalunaarutigisarnissaallu.
- Angerlarsimaffimmi ikiorteqarnermi aningaasartuutit ataavartumik killiffissiortassallugit, ilanngullugit imertaassinerit, atortunut aningaasartuutit il.il., tamakkulu statistik atorlugu kisitsisitigut takussutissarsiortassallugit.
- Angerlarsimaffimmi ikiorteqarnerup iluani naammagittaalliutit ataavartumik malinnaaffigalugillu nalunaarutigisassallugit, immikkoortortamilu pisortamik suleqateqarluni piaartumik iluarsiniartassallugit pisariaqarfiatigut sulisoqarnermut kommunip immikkoortortaqarfia HR-eqarfik suleqatigalugu.
- Immikkoortortami sulisunut aamma nunaqarfinni angerlarsimaffimmi ikiorteqarnermut tunngatillugu ilitsersuineq siunnersuinerlu ajornartorsiutaasinnaasut pillugit.
- Utoqqarnik sullissisut allat ataatsimiinnerini peqataaneq, kiisalu isumaginninnermi immikkoortortaqarfimmi sulianik sullissisunik sulisunillu allanik ataatsimeeqateqartarneq.
- Ataqatigiissaarisitut suliassat aamma angerlarsimaffimmi ikiortinut oqaloqatigineqarsinnaasutut siunersiorneqarsinnaasutullu inissisimaneq, ilaatigut sulisunut ataasiakkaanut tunngasut aamma suliamut inuttullu sulisunik ineriartortitsineq.
- Oqarasuaatikkut suleqatigiillu kommunimi angerlarsimaffimmi ikiortit akornanni aammalu qitiusumik isumaginninnermut ingerlatsivimmiit, immikkut ilisimasalinnik ataatsimeeqatigiinnerni, akuttunngitsumik peqataasarneq.
Piginnaasassat:
- Naleqquttumik ilinniagaqarneq.
- Angerlarsimaffimmi ikiorteqarnerup iluani suliassanik soqutigisaqarneq.
- Suliumassuseqarluartoq, imigassamik aanngajaarniutinilluunniit ajornartorsiuteqanngitsoq.
- Marluinnik oqaasilik, kalaallisut qallunaatullu, tamannali sanioqqunneqarsinnaanngitsumik piumasaqaataanngilaq.
Naatsorsuutigissavat atorfimmut atatillugu pikkorissarnissamut periarfissaqarumaarmat.
Akissarsiat atorfinitsitaanermilu atugassarititaasut:
Akissarsiat atorfinitsitaanermilu atugassarititaasut, Naalakkersuisut kattuffiullu isumaqatigiinniussisinnaatitaasup akornanni isumaqatigiissutit atuuttut tunngavigalugit.
Atorfimmut atatillugu inissaqartitsisoqanngilaq.
Atorfinitsitsineq pissaaq pinerluuteqarsimannginnermut uppernarsaatit naammaginartut pissarsiarineqarpata, tamanna qinnuteqartup atsioreerneratigut sulisitsisup Rigspoliteqarfimmut pissarsiariniassavaa.
Attaveqarfissaq:
Atorfik pillugu annertunerusumik paasiniaasoqarsinnaavoq Immikkoortortami pisortamut, Julie Jakobsen Grønvold-imut saaffiginnilluni, oqarasuaat +299 38 78 00-imut imaluunniit allalluni: jugr@avannaata.gl -imut.
Qinnuteqaat nassiunneqassaaq ilanngullugit ilinniakkamik soraarummeerluni uppernarsaatit, CV, oqaaseqaatit, paasiniaaffigineqarsinnaasut, meeqqanik pinerliisimannginnermut pinerluuteqarsimannginnermullu uppernarsaatit, kingusinnerpaamik 28. oktober 2024
Qinnuteqarnissamut killissarititaasoq: oktobarip 28.-at, 2024