Avannaata Kommuniata Uummannami innarluutilinnut sullissisussatut Atorfiit 1. December 2025-imiit imaluunnit isumaqatigiissuteqarnikkut inuttassarsiunneqarpoq.
Innarluutilinnut sullissisut inunnik isumaginninnermi immikkoortortaqarfimmi aqutsisoq qaninnertut qullersarissavaa.
Atorfimmi suliassarisassat makkuussapput:
·Innarluutilinnut ilaqutaannullu tunngasunut saaffiginnittut isumagalugit, siunnersuinermillu ingerlatsinerit.
·Innarluutilinnut tunngasuni sullissinerit tamaasa isumagalugit.
·Innarluutillit pillugit peqqussut naapertorlugu qinnuteqaatinik suliaqarneq.
·Ikiorsiissutinik tunniussinermi pisortanit akuersissuteqarnermi allakkiorneq, kiisalu annertunerusumik aningaasartuuteqarnerunissamik allanillu ikiorsiissutinik innarluutilinnut peqqussummi taaneqartut najoqqutaralugit suliaqarneq.
·Innarluutillit najugaqarfiini atugassarititanik malittarinninneq nakkutiginninnerlu, pisariaqartitsisoqartillugulu ikiuigasuarnissamik nalunaaruteqartarneq.
·Sulianut tunngasunik suliassanik allanik suliaqarneq.
Taakku saniatigut atorfik pillugu akisussaaffiit allaaserinninnerillu Uummannami ilaqutariit immikkoortortaqarfimmi aqutsisumut saaffiginnilluni pissarsiarineqarsinnaapput.
Piginnaasat kissaatigineqartut:
·Isumaginninnermi siunnersorti, rådgivningsassistenti, allaffimmioq sammisamut pikkorissarsimasoq inunnik isumaginninnermi inatsisinik, perorsaasoq isumaginninnermik aammalu allaffissornermik pikkorissarsimasoq imaluunniit isumaginninnermi ikiorti isumaginninnerup iluani pikkorissarsimasoq.
·Isumaginninnerup iluani sullissinermik misilittagalik perusunneqarpoq.
·Qarasaasiamik atuilluarsinnaasoq.
·Kalaallisut qallunaatullu oqalussinnaaneq/allassinnaaneq iluaqutaassaaq.
·Sullisserusussuseqarneq, aalajaanneq, peqqissaartuuneq suleqateqarluarsinnaanerlu.
Akissaatit atorfeqartitaanermilu atugassarititaasut:
Atorfininnermi atugassarititaasut Naalakkersuisut peqatigiiffiullu isumaqatigiinniarsinnaatitaasup akornanni isumaqatigiissut atuuttoq naapertorlugit pissapput.
Atorfimmut atatillugu inissaqartitsisoqanngilaq.
Pinerluuteqarsimannginnermut uppernarsaatit:
Pinerlussimannginnermut uppernarsaatit naammaginartut tunngavigalugit atorfinitsitaaneq pissaaq, taakkulu qinnuteqartup akuersineratigut Rigspolitiinit sulisitsisumiit piumaneqassapput.
Attaveqarfissaq:
Atorfik pillugu paasissutissat allat Uummannami Ilaqutariit immikkoortortami aqutsisuugallartumut, Regine K Tobiassen-mut, oqarasuaat 38 78 29 imaluunniit E-mail rekc@avannaata.gl atorlugu saaffiginninnikkut piniarneqarsinnaapput.
Qinnuteqaat ilinniarsimanermut siornatigullu sulisimanermut paasissutissanik imalik, ilanngullugit soraarummeernermut il.il. allagartat Avannaata Kommuniata nittartartagaata ataanut iserluni apuutereersimassapput kingusinnerpaamik ulloq 21-11-2025.
Qinnuteqarnissamut killissarititaasoq: novembarip 21.-at, 2025