Ulloq 1. augusti 2026 atorfinittussamik imaluunnit isumaqatigiissuteqarnikkut atorfinittussamik.
Kangiata allaffia piffissaq tamakkerlugu atorfimmut suliaminut tunniusimasumik namminersorlunilu sulisinnaasumik attaveqaqatigiinnermut sulisussarsiorpoq. Atorfik UNESCO-p Nunarsuarmi kingornussassiaa Ilulissat Kangia pillugu paasisitsiniaanermik suliaqarnissamut, aammalu sumiiffiup pinngortitakkut kulturikkullu immikkuullarissunik nalinginik innuttaasunut, atuarfinnut tikeraartunullu paasinninnerulersitsinissamut peqataanissamut periarfissiivoq.
Pingaarnertut suliassarissavatit:
- Kangiata allaffiata attaveqarnera isumagissallugu, aammalu allaffiup avammut saqqumilaartuunissaa isumagissallugu
- Kangiata allaffiata nittartagaa inuttullu attaveqaqatigiittarfiini qupperneri nutarterlugillu ineriartortissallugit
- Ilisimatusartunik attaveqateqartassalluni, aammalu ilisimatusarluni suliniutinit ingerlanneqartunit paasisanik pissarsisassalluni, taakku tamanut saqqummiunneqarsinnaaqqullugit
- Nutaarsiassanik, paasissutissiinermut atortussanik paasisitsiniaanermullu imarisassanik allanik suliaqassalluni
- Kangiata allaffiata atuarfinnut sullissinera Ilulissani atuarfiit ilinniarfiillu qanimut suleqatigalugit isumagissallugu
- Atuarfinnut sullissinermut ilinniartitsinermi paasissutissiinermilu atortussanik suliaqassalluni
- Atuarfinnut orniguttassalluni, UNESCO-p Nunarsuarmi kingornussassiaa, Kangiata allaffiata suliaa kiisalu sumiiffiup illersorneqarnissaata pingaaruteqarnera pillugit paasissutissiisassalluni.
- Meeqqat inuusuttullu nunarsuarmi kingornussassiaqarfimmik ilisimasaqarnerulernissaannut, aammalu sumiiffimmut akisussaaqataasutut isiginninnerulernissaannut, peqataassalluni
- Takornarianut Ilulissat Kangia, UNESCO-mi sulineq kiisalu sermip kangerluullu maanna qanoq innerat pillugit oqalugiarnernik paasissutissiilluni ataatsimiinnernillu ingerlatsisassalluni
- Takornariartitsinermi suliaqartut, takornarianik angallassisartut kiisalu takornariartitsinermi inuussutissarsiummi suleqatigisat allat ingerlaavartumik attaveqarfigisassallugit
- Takornarianik angallassisartut, angalatitsisartut sumiiffimmilu paasissutissiisartut allat UNESCO-p Nunarsuarmi kingornussassiaanik ilisimasaqarnerulernissaannut peqataassalluni
- Nunarsuarmi kingornussassiaqarfik, malittarisassat atuuttut kiisalu Kangiata maanna pissusia pillugit takornarianik angallassisartunut takornariartitsinermilu suliaqartunut paasissutissiinermut atortussanik suliaqassalluni paasissutissiillunilu ataatsimiinnernik ingerlatsisassalluni
- Sumiiffimmut tikeraartunut nunarsuarmi kingornussassiaq pillugu paasissutissiisarnerup ataatsimoortumik eqqortumillu ingerlanneqarnissaa qulakkeerniarlugu sulinermi peqataassalluni
Illit pillutit naatsorsuutigaarput:
- Attaveqaqatigiinnermut, paasisitsiniaanermut imaluunniit ilinniartitsinermut misilittagaqartoq
- Allattariarsornermi pikkorittoq, aammalu sammisanik paasiuminaassinnaasunik anguniagaqatigiinnut assigiinngitsunut paasinartumik ingerlatitseqqissinnaasoq
- Pinngortitamut, kulturikkut kingornussassanut UNESCO-llu Nunarsuarmi kingornussassiaanut soqutiginnittoq
- Nammineerluni sulisinnaasoq, aaqqissuussamik suleriaasilik suliniuteqarsinnaassusilillu
- Allaffimmi sulineq aammalu inuit toqqaannartumik attaveqarfigalugit paasisitsiniaaneq nuannaralugit suliffigisinnaagai
- Eqaatsumik sulisinnaasoq, aammalu Kangiata allaffiata pingaarnertut suliassaqarfiata avataani suliassanik, tassunga ilanngullugit Avannaata Kommuniani immikkoortortanut allanut attaveqaqatigiinnermut paasisitsiniaanermullu suliassat, suliarinissaannut piareersimasoq
- Kalaallisut, qallunaatut tuluttullu allattariarsornermi oqalunnermilu atuisinnaalluartoq
Akissarsiat atorfeqartitaanermilu atugassarititaasut:
Atorfik Ilulissani Kangiata allaffiani piffissaq tamakkerlugu atorfiuvoq.
Akissarsiat atorfinitsitaanermilu atugassarititaasut isumaqatigiissut atuuttoq naapertorlugu aalajangersarneqassapput.
Atorfimmut atatillugu inissaqartitsisoqanngilaq.
Kikkuuvugut:
Kangiata allaffia Avannaata Kommunianut ilaavoq, Ilulissat Kangiatalu nunarsuarmi kingornussassiaqarfittut allaffiatut atuulluni. Allaffik UNESCO-p Nunarsuarmi kingornussassiaanik aqutsineq, nakkutilliineq, ilisimatusarneq, paasissutissiineq paasisitsiniaanerlu pillugit suliaqartarpoq.
Kangiata allaffia Kangiata Illorsuaniinngilaq (Isfjordscenterimiinngilaq).
Qinnuteqaat, ilinniagaqarsimanermut siornatigullu suliffigisimasanut paasissutissartalik, ilanngussanik attuumassuteqartunik ilaqartillugu nassiunneqassapput, Avannaata Kommuniata nittartagaani ”Atorfik una qinnuteqarfigiuk” toorlugu nassiunneqassallunilu.
Atorfik pillugu paasisaqarnerorusukkuit saaffiginnissinnaavutit Site Managerimut Bo Albrechtsenimut e-mail-imik nassiussillutit; boal@avannaata.gl
Qinnuteqarnissamut killissarititaasoq: juulip 20.-at, 2026